[Рецензија: КУРИР: Екс советникот на Оливер Спасовски во украинско сценарио]

Пред нас имаме наменски скроена спинерска конструкција, во која на удар е претставник на раководните структури на најголемата опозициска партија. Истовремено, оваа тенденциозна и манипулативна објава, која прозвучува со нетрпеливост, па и со анимозитет кон социјалдемократот Едмонд Адеми, ја вознемирува публиката, заплашувајќи ја со наводно украинско сценарио.

Линк до оригиналниот напис: КУРИР: Екс советникот на Оливер Спасовски во украинско сценарио

Датум и време на објавување: 29.05.2016, 11:24

Датум на рецензирање: 31.05.2016

Рецензент: Владо Ѓорчев

СПИНУВАЊЕ СО СТАРИ ОБЈАВИ НА „ФЕЈСБУК“

Написот ги нема потребните елементи на еден коректен новинарски производ – вистинитост, содржајност, објективност. Од стари фејсбук-статуси се прави тенденциозна приказна за Адеми и притоа се изнесуваат злонамерни, но и опасни обвинувања дека тој повикува на насилство:

„Адеми, кој е член на Извршниот и Централниот одбор на СДСМ, јавноста го запозна преку неговиот повик на Фејсбук да се лее крв на улиците.“

Инаку, овој статус на Адеми е од јануари 2015 година, напишан во затегната политичка состојба, во време кога во организација на „Студентски пленум“ се одржуваа протести против реформите во високото образование. Кога Апелациониот суд конечно ја обелодени долгоочекуваната пресуда, според која новинарот Томислав Кежаровски беше осуден на две години затвор (односно ја  намали првостепената пресуда од четири години и шест месеци затвор на две години), за наводно откривање идентитет на заштитен сведок. Неполни 24 часа откако беше објавена одлуката на Апелацискиот суд, Кежаровски  со полиција и со лисици на рацете беше спроведен во истражниот затвор во Шуто Оризари, за доиздржување на затворската казна од три месеци и 10 дена. Во знак на револт, новинраските организации и невладиниот сектор организираа протест пред Апелацискиот суд за слобода на Кежаровски.

Споменатата објава на Адеми на „Фејсбук“ е инспирирана од општата политичка атмосфера во земјата и претатсваува личен, емотивен одговор за тоа како се практикува демократијата и како се дели правдата. Неговата порака е реторичка и тој, веројатно, алудира на тоа дека без масовни и жестоки протести не може да се урне оваа владејачка гарнитура. Во текстот што го рецензираме, пак, се претставува дека тој, наводно, повикува или провоцира наслиство.

КРАЈ НА СВЕТОТ!

Текстот спинува и со уште еден фејсбук-статус на Адеми  од 7 мај годинава, поттикнат од изборот на „првиот муслиман за градоначалник на Лондон“, а ставен во контекст на нашата политичка реалност и со нагласок на (не)расположението на владејачката партија за опцијата премиер да биде Албанец. Настрана што заложбата на Адеми за премиер Албанец, текстот ја претставува како да е во прашање „катаклизма“ или „крај на светот“,  во него се пласира и невистина дека Адеми се злагал за федерализација.

„Откако беше награден за ваквите ставови од неговите партиски шефови, продолжи во истата насока. Иако земаше пари од државата, Адеми продолжи да ги промовира партиските политики на СДСМ и да се залага за федерализација и премиер Албанец.“

Инаку, Адеми е на удар и поради тоа што беше вработен во кабинетот на техничкиот министер за внатрешни работи, Оливер Спасовски. И независно што за неговиот ангажман земал надомест – плата, како и сите вработени во министерствата, во написот се тврди дека тој бил „ награден“. Само, според таквата логика, излегува дека и сите советници во министерствата и во Владата се „наградени“.

ВТОРАТА СТРАНА – ИГНОРИРАНА

А, кога веќе некој се напаѓа, коректно е да се побара изјава, став од него – во конкретниот случај од Адеми. Но, туку втората страна е целосно игонрирана. Меѓутоа, од конструкции текст не бива. Тоа нема врска со принципите на професионално новинарство, туку наликува на материјал за политичко-партиска употреба.

Со овој нагласено пристрасен материјал се повредени повеќе членови од Кодексот на новинари.

Новинарот треба да објавува точни, проверени информации и нема да прикрива суштински податоци…

…Точноста на информацијата треба да се провери колку што е тоа можно.  (член 1)

Новинарот мора да обезбеди професионална дистанца од политичките субјекти.(Член 14)

Новинарот ќе ги чува угледот и достоинството на својата професија и нема да го употреби својот медиум за пресметка со личности, вклучувајќи ги и своите колеги. (Член 16)

Инаку, овој оцрнувачки текст е целосно преземен од друг портал  (заедно со насловот, фотографиите и со видеозаписот), тоа е назначено со потемни букви и изгледа како да има линк, ама тој не е активен, што, исто така, претставува пропуст.