[Рецензија: Заев тргна директно против пензионерите, администрацијата, социјалците и земјоделците ]

Ова е еден политички мотивиран текст, кој изобилува со коментаторски елементи и кој има цел да го дискредитира во јавноста врвот на опозицискиот СДСМ.

Линк до оригиналниот напис: Заев тргна директно против пензионерите, администрацијата, социјалците и земјоделците

Датум и време на објавување: 01.12.2015

Датум на рецензирање: 08.12.2015

Рецензент: Ана Анастасовска

НЕАРГУМЕНТИРАНИ НАПАДИ

Уште во самиот почеток на текстот се создава една лоша слика за двоецот Заев – Шекеринска, за што, пак, нема никакви аргументи.

„Мултимилионерот Зоран Заев, кој заедно со Радмила Шекеринска со своите милиони ја предводат опозициската партија СДСМ, сега, по договорот од Пржино, мислат дека може да прават што сакаат.“ 

Заев и Шекеринска се посочуваат како милионери, а нема објаснување за таквата констатација, односно нема приложено никаков доказ за нивната финансиска состојба.

Потоа, повикувајќи се на анализи на јавното мислење, без да се  каже конкретно за кои рејтинг-агенции станува збор и каде се резултатите од нивните испитувања, ги наведува читателите на мислење дека СДСМ ќе ги изгуби и изборите во април наредната година. Всушност, текстот се става во улога на претскажувач, а тоа нема некаква поврзаност со новинарската професија.

Написот продолжува со оцрнувачки тон и вели:

„Први на удар на нивната одмазда и омраза се луѓето што го прочитаа антидржавното однесување и не им дадоа поддршка. Со своите инсталации во власта поставени спротивно на изразената политичка и демократска волја на граѓаните преку избори, врхушката на СДСМ сака да му наштети на секој граѓанин, терајќи свој политички хир поттикнат од патолошката омраза и реваншизам.“ 

Но, „омраза и одмазда“ се сериозни квалификации и за да се каже тоа, треба да се има сериозни докази и индикации дека, во случајов, Заев и Шекеринска, чувствуваат такво нешто.

Исто така, текстот не нуди ниту поткрепа за тврдењето:

„…струмичкиот градоначалник, кој пак само во годините кои ги оценува како „режимски“, признава дека успеал да стекне милионски суми на евра.“

Кога и каде Заев признал дека успеал да стекне милионски суми евра? Има ли авторот на овој текст доказ за ваквите тврдења? Ако има, треба да му ги пренесе на читателот, во спротивно сето тоа паѓа во вода.

МАНИПУЛАЦИЈА

Во вториот дел од написот на читателската публика ѝ  се сервира една фино спакувана манипулација дека Наумов е виновен што ќе немало пари за исплата на пензии и плати! Тука се мисли на ветото што Наумов го стави за задолжувањето од 500 милиони евра преку издавање еврообврзница, по што државата се задолжи само за 270 милиони евра.

Па, според логиката на оваа манипулација, поради тоа што Неумов спречил речиси двојно поголемо задолжување, ќе нема пари за плати и за пензии. А, зошто државата мора да се задолжи за да ги исплати пензионерите и социјалците? На тоа прашање авторот на овој текст нема одговор.

Завршниот дел од написот испраќа предупредувачка порака до читателите во стилот „Еве што ќе се случи ако Заев и Шекеринска дојдат на власт“.

 „Ако сега, со неколкумина технички министри и заменици СДСМ успева да го доведе во прашање нормалното функционирање и финансиското работење на државата, граѓаните со право се прашуваат, како и каде ли СДСМ планира да ги одведе државата и граѓаните доколку ја преземат власта?“

Ова прозвучува како фрагмент од политички говор и нема некоја допирна точка со новинарството. Еден професионален новинарски текст треба да понуди информации, факти и докази, а, пред сè, да се води од јавниот, не од партискиот интерес.