[Рецензија: Кој друг се следи од полицијата на СДСМ?]

Евидентираните извори во написот застапуваат иста страна, а воведот кон нив е изведен со серија коментари. Направен е политички спин за да се испере образот на политичар од власта  кој беше инволвиран во инцидент низ скопските улици.

Линк до оригиналниот напис: Кој друг се следи од полицијата на СДСМ?

Датум и време на објавување: 04.11.2016 15:21

Датум на рецензирање: 07.11.2016

Рецензент: Александар Пешев

СПАСОВ КАКО „ЖРТВА“

Прашањето што се поставува во насловот, во содржинскиот дел од текстот се одговара со коментари, а самиот вовед наликува на партиско соопштение:

„СДСМ целосно го стави МВР во своја служба само за да оствари партиски поен плус и да се пресмета со неистомислениците“.

Кој го вели ова? Врз основа на кои факти или на чие мислење се темели ваквата изјава? Наместо одговор на овие прашања за да се задоволат основните професионални стандарди, се редат дополнителни коментари што го засилуваат впечатокот за политичката пристрасност на објавата.

„Грозоморната криминално-полициска местенка на Диме Спасов е само еден од примерите кои се одговор на прашањето „До каде се спремни да одат Заев и Спасовски“?“

Не се знае според кој критериум е утврдено дека станува збор за „грозоморната криминално-полициска местенка“ и кои докази стојат зад ваквото тврдење. Написот го претставува Спасов како жртва, а истовремено ги оцрнува Заев и Спасовски, претставувајќи ги како личности што „ја узурпираат слободата и ја газат демократијата“.

Следниот коментар укажува на непочитување или непознавање на една од основните премиси во професионалнотото новинарство – да се пишува со факти:

„Очигледно е како Спасовски го партизираше МВР, вработувајќи свои луѓе. Уште поскандалозно за јавноста беше вработувањето на криминалци со дебели досиеја, со кои Спасовски очигледно одлично соработува, па и вчера за случајот со Спасов, застана во нивна одбрана“.

Ништо не е очигледно без факти, докази и без податоци. Дополнително, во написот се тврди дека одредена постапка била скандалозна за јавноста, а во текстот нема ниту една изјава од анкетиран граѓанин во прилог на таквата констатација.

САМО ЕДНА СТРАНА

Во првите шест пасуси од текстот нема ниту еден факт, ниту една изјава ниту, пак, нотиран извор на информации. Првите десетина реченици се коментари. Текстот продолжува со изјави на двајца соговорници. Не е јасно зошто нивните изјави не се употребуваат од самиот почеток на написот и зошто наместо да се нижат коментари, едноставно не се поставеле прашања кои соговорниците би ги одговориле.

Поднасловот и контекстот во кој се употребени изјавите создава впечаток дека се прави обид да се комплетира спинот со долгите цитати од двајцата соговорници.

„Чавков предупреди: Можно е СДСМ повторно да ги употреби партиските војници во МВР за незаконски активности.“

Повторно се поставува прашањето зошто првичните десетина коментари не се поврзани со ставовите на соговорниците? Во контекст на изборот на соговорници, вреди да се нотира дека тие застапуваат иста страна, која се противи на постапките на опозицискиот лидер и на техничкиот министер од редовите на СДСМ. Мора да се забележи дека едностраноста е комплетирана со тоа што нема никаков став од прозваната страна.

Текстот создава простор за лична и за партиска дискредитација, а читателот нема доказ дека е направен каков било обид да се побара мислење или изјава од СДСМ, Заев или Спасовски, во врска со обвинувањата против нив.

Сè на сè, имаме еднострана објава која се темели на коментари издржани со еднострани изјави за кои не се понудени конкретни докази.