Неетичка и оцрнувачка објава
Објавено во Рецензии
on 17 - 02 - 2017 Автор: Димитар Тануров[Рецензија: ЕВЕ ЗОШТО ЗОРАН ПОПОВСКИ Е ОЧАЕН КАДАР НА ДПМНЕ И КАБИНЕТОТ ВО АГЕНЦИЈА ЗА ХРАНА И ВЕТЕРИНАРСТВО]
Материјалот пред нас е неетички и оцрнувачки, наликува на евтина чаршиска приказна која не заслужува да биде пласирана како новинарски текст. Објавата нема ниту еден елемент на професионално новинарско информирање, таа изобилува со неосновани навредливи коментари насочени кон дискредитација на директорот на Агенцијата за храна и ветеринарство, Зоран Поповски, но и на други личности кои се споменуваат во содржинскиот дел.
Линк до оригиналниот напис: ЕВЕ ЗОШТО ЗОРАН ПОПОВСКИ Е ОЧАЕН КАДАР НА ДПМНЕ И КАБИНЕТОТ ВО АГЕНЦИЈА ЗА ХРАНА И ВЕТЕРИНАРСТВО
Датум и време на објавување: 13.02. 2017
Датум на рецензирање: 17. 02. 2017
Рецензент: Димитар Тануров
НАВРЕДЛИВА СОДРЖИНА
Сензационалистичкиот наслов најавува текст кој би требало да открие зошто Попоски, наводно, е несоодветно решение за челната позиција во Агенцијата за храна и ветеринарство. Сепак, насловот има цел да собере што повеќе кликнувања и претставува своевидна јадица за празниот и навредлив текст што следува.
„Овој десно господин ви е драги читатели Директорот на Агенцијата за храна Зоран Поповски,
Негова сакана другарка ( ме разбирате де) и шеф на неговиот кабинет е таа лево Катерина Матиќ таа и е позната на јавноста од бомбите на Заев, беше главна старлета во кабинетот на Министерот за чоколади Ставревски во финансии де инаку по професија вади заби-стоматолог е“.
Оваа медиумска содржина не дава одговор на клучните новинарски прашања: кој, кога, како, каде и зошто? Првата реченица, пак, слободно може да се прескокне, доколку под сликата се стави легенда во која ќе се идентификуваат и посочат лицата. На пример: Директорот на Агенцијата за храна, Зоран Поповски (десно), Светлана Колариќ (средина), Катерина Матиќ (лево).
НЕПОТКРЕПЕНИ ОБВИНУВАЊА
Написот се фокусира на наводната љубовна афера меѓу Попоски и Матиќ, за која нема понудено никакви докази. Притоа, се нафрла и дека тие, наводно, се корумпирани, односно дека големи компании ги поткупуваат со патувања и со слични „репрезентативни подароци“.
„Некои поголеми фирми редовно ги частеле прошетки, спа третмани, живот на висока нога. Сите поголеми фирми се умрени од страв од нејзиното височество челичната лејди Матиќ“.
При изнесување на вакви тврдења, потребно е истите да бидат поткрепени со прецизни извори и со докази. Но, во конкретниот случај не се посочуваат ниту извори за наводните информации, ниту факти. А доколку нема доказ за ваквите наводи, тогаш станува збор за клевета (што е казниво по приватна тужба), но и спротивно на новинарските стандарди.
Во последните неколку пасуси се прави спин, со кој трите наведени лица се обвинуваат дека, наводно, лажирале „птичји грип“ за да го оттргнат вниманието на јавноста. За ваквото обвинување, исто така, нема никаква потврда, како и за делот за наводните роднински и пријателски врски на споменатите личности.
Написот е во спротивност со принципите утврдени во Прирачникот за етика во новинарството и се коси со повеќе членови од Кодексот на новинарите, кој налага објавување точни и проверени информации, да се прави разлика меѓу вест и коментар, да се обезбеди професионална дистанца при информирањето, да не се зазема страна и да не се користи медиумот за оцрнување личности.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
политичка дискриминација
УРЕДЕН ЗА ВЕБ
средно читлив
нема мултимедијални елементи
нема контекстуални линкови
стилски неуреден
неповрзан со тагови