Насловот мора да се совпаѓа со текстот, а не да виси
Објавено во Рецензии
on 22 - 04 - 2016 Автор: Владо Ѓорчев
[Рецензија: (ФОТО) Македонските политичари во паника ги изнесуваат парите и златото надвор од државава!?]
Текстот, во суштина, не би предизвикал поголемо внимание, да не е насловот. Написот навистина е едностран, затоа што само голо се преведени информации од српските портали, без притоа да има „додадена вредност“. Но, тоа што, сепак, го прави погоден за рецензија, е невистинитоста или недоволната аргументација за потврда на насловот.
Линк до оригиналниот напис: (ФОТО) Македонските политичари во паника ги изнесуваат парите и златото надвор од државава!?
Датум и време на објавување: 18.04.2016
Датум на рецензирање: 22.04.2016
Рецензент: Владо Ѓорчев
ГЛАВЕН ПРОБЛЕМ – НАСЛОВНАТА КОНСТРУКЦИЈА
Написот е преземен од некој од српските портали што објавија информација за запленети злато и евра на македонско-српската граница. При проверка низ српските медиуми, се заклучува дека преводот е од „Курир.рс“, само што во тој текст има чисто информативен наслов: „Плен: Царинците пронашле 99.000 евра и 47 пакети злато“. Во текстот што го рецензираме, насловот е редакциска интервенција: паушален, без аргументи и без никаква потврда за таквата шпекулација во текстот.
Нема никаква назнака дека станува збор за политичари, а информацијата се злоупотребува и се става во контекст на актулната политичка состојба во земјава.
Во написот, исто така, не може да се види дека се направени некави напори да се дознае нешто повеќе, да се истражи и, конечно, да се дојде до вистината.
Следните денови во српските медиуми немаше многу информации за овој случај, за разлика од македонските, кои ја „разработуваа“ приказната. Сепак, и тие информации беа врз база на шпекулации, без официјални извори и аргументи.
Материјалот што го рецензираме е илустриран со фотографија на која пишува дека е од „Танјуг“ и истата ја има во српските медиуми, но не е наведено дали е архивска или станува збор за фотографија од местот на настанот.
Во текстот може да се забележат прекршувања на неколку членови од Кодексот на новинари , меѓу кои, член 1 во кој стои:
Новинарот има право на слободен пристап до сите извори на информирање што се од јавен интерес.
Новинарот треба да објавува точни, проверени информации и нема да прикрива суштински податоци и да фалсификува документи.
Доколку информацијата не може да се потврди или станува збор за претпоставка, односно шпекулација, тоа треба да се каже и да се објави.
Точноста на информацијата треба да се провери колку што е тоа можно.
Прекршен е и член 4:
Новинарот ќе го назначи изворот на информациите, но ако изворот бара да остане анонимен, новинарот ќе го заштити.
Прекршен е и член 12, кој забранува плагијаторство и кој вели дека:
Цитатите не смеат да се користат без да се нагласи изворот или авторот.
Може да се заклучи дека текстот ја има првичната информација пренесена (преведена) од српски медиуми, без тоа да се нагласи. Тоа не е доволно за професионален текст, а прекршувањата на стандардите се видливи. Сепак, најголемата повреда е во насловот, кој е шпекулативен, без аргументација и го наведува читателот со непоткрепена информација на друг терен.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
делумно
ИЗВОРИ НА ИНФОРМАЦИИ
има евидентирани извори
официјални, неофицијални, анонимни
нерелевантни
не може да се утврди
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
делумна копија
ненаведен автор, наведен извор без линк
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
наведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
нема мултимедијални елементи
нема контекстуални линкови
делумно стилски уреден
неповрзан со тагови