Крвавиот плен не е рекорд за пофалби
Објавено во Рецензии
on 2 - 02 - 2017 Автор: Југослава Дуковска
[Рецензија: Нов рекорд во Македонија: Ловџиите совладаа 19 диви свињи во Преспа (ФОТО)]
Оваа фото-вест предизвика бурни реакции на социјалните мрежи поради својата содржина и насловот. Имено, се работи за информација дека група ловџии отстрелaле 19 диви свињи и со тоа се пофалиле на јавноста, фотографирајќи се со својот плен. Вообичаено, вести за исход од нечиј лов ретко го наоѓаат својот пат до медиумите освен кога се работи за некаков рекорден улов или за отстрел на таканаречен „штетен дивеч“, најчесто волци кои нападнале нечии стада овци. Во овој случај се работи за невообичаено голем број убиени животни за време на отворена ловна сезона. Она што боде очи е лошо срочениот наслов, кој изгледа цинично и несоодветно, а во комбинација со фотографиите на убиените животни распослани врз окрвавениот снег, е вознемирувачки за јавноста.
Линк до оригиналниот напис: Нов рекорд во Македонија: Ловџиите совладаа 19 диви свињи во Преспа (ФОТО)
Датум и време на објавување: 29.01.2017
Датум на рецензирање: 1.02.2017
Рецензент: Југослава Дуковска
СОВЛАДАА ИЛИ ОТСТРЕЛАА?
Каква вест е тоа дека група луѓе со пушки отстрелала 19 животни? Би рекле – неинтересна, депласирана или можеби вест која би можела да најде место во специјализирано списание за лов и за риболов, наменето за конкретна читателска популација. Но, освен тоа, во насловот е избрана крајно несоодветна конструкција за да се соопшти веста – тешко дека поинаку освен како малициозно може да се оцени тврдењето дека ловџиите „совладале“ 19 диви свињи, небаре биле голораки против нив. Реалноста ја покажуваат самите фотографии – се работи за млади, мали примероци од овој животински вид, отстрелани од ловџии опремени со софистицирана опрема и оружје, па тешко е да се поверува дека им било тешко да ги совладаат.
На вебстраницата на медиумот кој ја објави оваа фото-вест сè уште трае жестока дискусија помеѓу бројните читатели, згрозени што масовното убивање на животни во само еден ден (па макар и во ловна сезона) некој воопшто може да го прогласи за „нов рекорд“ и да го поздрави како „совладување“, и помалубројните, кои сметаат дека сè било направено во рамките на законот. Првите потсетуваат дека дивите свињи биле отстрелани во деновите на најголем студ, односно поларна температура и под минус 20 Целзиусови степени, што придонело целиот дивеч да биде истоштен поради недостиг од храна, а поради тоа и лесен плен за ловџиите. Од овој агол, насловот изгледа уште понесоодветно, а целиот напис, всушност, прилега на непотребна промоција на насилство над животните.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
неофицијални
релевантни
1 извор
еднострани
СЕОПФАТНОСТ
сеопфатнo
нема прикриени информации
ПРИСТРАСНОСТ
целосно прикажува вистина
извртување на вистина (спин)
не може да се утврди
наклонетост
друга пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
не информира
некреативен
сензационален
невкусен и несоодветен
јасен
ФОТОГРАФИЈА
има
соодветна
информира
ненаведен автор(извор)
ГОВОР НА ОМРАЗА
нема навредлив говор
нема говор на омраза
потикнува на насилство
не дискриминира
УРЕДЕН ЗА ВЕБ
читлив
нема мултимедијални елементи
има контекстуални линкови
делумно стилски уреден
неповрзан со тагови