Напис: Повеќе од 200.000 „невработени бадијалџии“ не планираат да работат во Хасанбег?!

Скопје, 10 август – Во Македонија продолжува една чудна ситуација, при што повеќе од 200.000 лица се евидентирани во Агенцијата за вработување како невработени, но воопшто не преземаат ниедна конкретна иницијатива за да се ангажираат во последните поплави што се случија во Хасанбег (с. Сингелиќ – заб. на СПВ на македонски јазик) и во другите скопски села. Овие невработени лица се со години евидентирани во Агенцијата за вработување и уживаат многу права од државата.

Добиваат помош од државата и имаат бесплатно здравствено осигурување. „Журнал“ прашува како е можно последниве денови, кога Општина Гази Баба бараше доброволци за чистење на населбите од последните поплави и за овие доброволци обезбедила и буџет, досега никој од овие 200.000 невработени да не одлучат да се ангажираат.

Ова јасно докажува дека повеќето од овие лица се евидентирани во Агенцијата за вработување само за да ги добијат бенефициите од државата и на ниеден начин да најдат некој ангажман во животот.

[Рецензија: „Повеќе од 200.000 „невработени бадијалџии“ не планираат да работат во Хасанбег?!“]

Во случаи кога е потребна сензибилизација на масата за да се преземе една одредена иницијатива, за одредена помош, медиумот може да избере секакви мотивирачки начини. По последните поплави во неколку скопски населби, потребна е организирана колективна доброволна работа, но во овој случај текстот не мотивира, туку ги „прекорува“ граѓаните што не помагаат, на некој начин потсетувајќи ги колку се бескорисни.

Линк до оригиналниот напис: „Над 200 илјади ‘невработени бадијалџии’ не планираат да работат во Хасанбег?!“

Датум и време на објавување: 10.08.2016, 12:22

Датум на рецензирање: 11.08.2016

Рецензент: Фатлуме Дервиши

Пристапот на авторот е целосно погрешен. Апсолутно, ниеден граѓанин на Република Македонија не е обврзан да им помогне на погодените и на оштетените жители од поплавите, само затоа што е жител на оваа држава и ги „користи нејзините добра“. Обврска имаат институциите и критиките треба да бидат насочени на нивна адреса. Но, според текстот, крајно време е, со други зборови, сите тие луѓе кои се евидентирани како невработени во Македонија, да се докажат дека вредат за нешто.

„Овие невработени лица се со години евидентирани во Агенцијата за вработување и уживаат многу права од државата. Добиваат помош од државата и имаат бесплатно здравствено осигурување“.

Скандалозна реченица е образложението дека овие луѓе уживаат многу права од државата. Правата се исти за сите граѓани. На еден медиум не му доликува да ја напаѓа својата јавност на овој начин, зашто седи и не презема ништо, како да ѝ го должи тоа на државата, бидејќи зема помош (не кажува за каква помош зборува конкретно) и има здравствено осигурување. Во текстот, исто така, нема доказ дали овие луѓе биле повикани од институциите, туку само констатација дека тие не помагаат.

„Ова јасно докажува дека повеќето од овие лица се евидентирани во Агенцијата за вработување само да ги добијат бенефициите од државата и на ниеден начин да најдат некој ангажман во животот“. 

Напротив, ова јасно докажува дека содржината е направена за да се држи страната на институциите и да се напаѓаат невработените лица, што не дошле да помагаат. Од професионален аспект би требало да биде спротивното. Авторот требаше да каже за работата што ја вршат институциите во овој случај: првин за несредувањето навреме на инфраструктурата во овие населби, нешто со кое последиците би биле многупати помали и, на крај, поради некористењето на сите нивни капацитети за помош на жителите.

Авторот првенствено требало да го почитува правото на овие невработени лица да направат сами свој избор, дали сакаат доброволно да помогнат или не. Потоа, најдобро што можеше да направи, да најде еден мотивирачки пристап, но секогаш професионален, за да им укаже на овие лица дека нивната помош е многу важна за жителите погодени од катастрофата.

Да не зборуваме, конечно, за бројот на невработени, што секогаш е една силна причина за медиумите за да се побара сметка од институциите. Но, ова е нешто сосема друго и нема зошто да биде поврзано со поплавите, како што е направено во текстот.