[Рецензија: МЕГА СКАНДАЛ: Во Брисел врие по откритието дека Ван Хојте бил потплатен од СДСМ со 1.250.000 евра за рушење на медиумите!]

Невистинит од насловот па сè до последната реченица. Ова би била куса дефиниција за писанието што користи форма на новинарски текст, но нема никаква врска со новинарството. Поттурен им е на читателите како информација за божемна коруптивна афера, опремен со бомбастичен наслов и потпрен на тврдење на сосема некомпетентен и нерелевантен извор.

Овој текст неуспешно се затскрива зад маската на истражувачко или вочдог-новинарство кое трагало и дошло до вистината, но тој не е ништо друго освен евтин пропагандистички памфлет наменет за дискредитирање на европосредникот Питер Ванхауте.

Линк до оригиналниот напис: МЕГА СКАНДАЛ: Во Брисел врие по откритието дека Ван Хојте бил потплатен од СДСМ со 1.250.000 евра за рушење на медиумите!

Датум и време на објавување: 5.02.2016

Датум на рецензирање: 9.02.2016

Рецензент: Југослава Дуковска

ОВА Е ИСТРАЖУВАЧКО НОВИНАРСТВО?!

Текстот се темели на тврдења кои не можат да поминат ниту како шпекулации бидејќи на читателите им се презентирани како тврдења на само една личност, која себеси нескромно се нарекува „исклучително добро информираниот новинар“. Тој, пак, се повикува на свои извори во десничарските европски партии. Нема ниту еден друг извор кој би можел на некој начин, посредно или непосредно, да ги потврди или барем да им даде некаква поткрепа на тие тврдења.

Но, наводите паѓаат во вода уште кога ќе се обидеме да го провериме основното тврдење, дадено во насловот, а тоа е дека има „мега-скандал“ и дека „во Брисел вриело по откритието дека Ванхојте бил потплатен од СДСМ со 1.250.000 евра за рушење на медиумите“. Доколку пребарувате материјал на оваа тема на интернет, ќе добиете податок дека нема ниту еден текст кој ниту допира, а не, пак, да пренесува информација за каков било скандал поврзан со името на европосредникот Питер Ванхауте, од кој „врие во Брисел“. Нема ниту информација дека тој е повлечен од својата позиција и не ја извршува повеќе својата посредничка улога во преговорите поврзани со Договорот од Пржино. Токму спротивното, Ванхауте, сè уште е во Скопје (11 февруари 2016 година) и ја извршува својата улога.

Од друга страна, пак, тешко може да се поверува, дека во случај навистина да имало каква било трага од сомневање, а не, пак, да постоел коруптивен скандал поврзан со името на Питер Ванхауте, Владата ќе дозволи тој и понатаму да ја врши истата функција, без да вложи протест или да побара негово отповикување од Европската унија. Со други зборови, наместо мегаскандал – гласна тишина.

Објавување на непотврдени информации за наводни скандали во чие средиште се личности, кои во континуитет се мета на шпекулации, неточни тврдења, па и на навреди, единствено говори за тоа колку неквалитетен материјал им е понуден на чиатателите

Инаку, во текстот особено шеговито прозвучува делот во кој врвот на СДСМ, онака попатно, додека го корумпирал Питер Ванхауте во „малото туристичко градче во Грција на брегот на Јонското море“, наводно, безуспешно се обидел  да ги подмити (!!!) и најекспонираните медиумски имиња кои ја бранат владината политика.

„Заклучокот на врвот на СДСМ било дека немаат ниту една друга можност да се справат со реалните медиуми во Македонија. Заклучиле дека не можат да ги купат како тоа што го направиле со 24Вести, Алсат и Телма. Исто така, и покрај тоа што нуделе, новинарите како Латас, Миленко, Јанко, Цаци, Сарма не прифатиле да се продадат за ниту една цена, а им биле нудени по 200.000 евра. – вели Неделковски.“