Рецензија: ФОТО: Ова е жената која на двапати ја ограби поштата во Катланово
Објавено во Рецензии
on 17 - 02 - 2014 Автор: Мирослава Симоновска
Членот 8 од Кодексот на новинарите го утврдува начелото на пресумпција на невиност во новинарското известување како професионален стандард:
Во судските постапки треба да се почитува принципот на пресумпција на невиност, да се известува за сите инволвирани страни во спорот и да не се сугерира пресуда.
Токму ова начело во написот кој го рецензираме е прекршено. Не само што е објавен идентитетот на осомничената, туку и нејзина фотографија. Секој има право на правично судење и е невин додека не се докаже спротивното. Без исклучок.
Линк до оригиналниот напис: ФОТО: Ова е жената која на двапати ја ограби поштата во Катлoново
Датум и време на објавување: 14.02.2014, 15:01
Датум на рецензирање: 15.02.2014
Рецензент: Мирослава Бурнс
Вистинитост: Во насловот се тврди дека жената на која новинарот ѝ го открива идентитетот, е сторител на кривично дело грабеж, што не е точно. МВР против неа има поднесено пријава за лажно пријавување кривично дело. Понатаму, формално правно, секој е невин додека не се докаже спротивното. Значи, жената е осомничена, а не виновна.
Извори на информации: Иако во текстот не е експлицитно наведено кој е изворот, на дното од текстот е наведено името на телевизијата од каде што текстот е преземен. Порталот изворно и дословно го презел текстот од телевизијата. Дел од информациите наликуваат како да се од полициски извор, односно билтенот на МВР, но ниту тоа не е јасно наведено.
Содржајност: Се пропушта да се наведе дека жената неколку дена претходно, самата дала изјава за медиумите во која тврдела дека некој ја ограбил. Така, всушност, медиумот дошол до идентитетот на осомничената. Меѓутоа, во случајот кога е осомничена, и за неа важи пресумпцијата на невиност, независно од тоа што претходно давала изјави во медиумите.
Оригиналност/Плагијат: Текстот е целосно пренесен и наведен е изворот на дното под текстот, а не во самиот текст. Читателот што нема да го прочита текстот до крај може да не го забележи ова.
Квалитет на насловот: Во насловот жената на која ѝ се открива идентитетот се претставува како сторител на кривично дело грабеж, се нуди информација дека при кликнувањето на текстот ќе се отвори и нејзина фотографија, со што грубо се крши пресумпцијата на невиност и можноста за правично судење. Насловот е сензационален и при неговото пренесувањето пренесена е и грешката во името на селото Катланово (во насловот стои „Катлоново“).
Фотографија: Нејасно е зошто жената е фотографирана во кревет и што тоа треба да симболизира. Понатаму, не ѝ е замаглен ликот, како што налагаат стандардите. Насловот открива дека тоа воопшто не била намерата на текстот. Напротив, намерата била да се открие идентитетот и да се открие како изгледа таа. Не е наведен авторот на фотографијата.
Заклучок: Пресумпцијата на невиност значи дека секој е невин додека не се покаже спротивното. Невиноста се докажува на суд, исто како и вината. Дотогаш, секој е невин, а медиумот што го тврди спротивното ја крши пресумпцијата на невиност пред воопшто органите да имаат можност да го расветлат докрај случајот и судскиот процес во со закон предвидена постапка да открие за што станува збор.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
има евидентирани извори
1 извор
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
лажни информации
наклонетост
друга пристрасност
КОМЕНТИРАЊЕ
ПЛАГИЈАТ
целосна копија
наведен извор без линк
КВАЛИТЕТ НА НАСЛОВОТ
дезинформира
сензационален
несоодветен
тенденциозен
ФОТОГРАФИЈА
има
несоодветна
дезинформира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови