[Рецензија: Соросовите медиуми објавуваат информации од истрагата, а Катица Јанева не гледа проблем во тоа што протекуваат доверливи податоци од СЈО]

Оцрнувачки текст, пишуван како по некој учебник. Ги содржи безмалку сите антиелементи на еден веродостоен медиумски производ. Има шпекулации, непоткрепено „расфрлање“ со тези, отсуство на реални извори, пристрасност, обележување други медиуми како опозициски и соросидни… Би кажале дека овој напис не е ништо ново во актуелната ситуација.

 Линк до оригиналниот напис: Соросовите медиуми објавуваат информации од истрагата, а Катица Јанева не гледа проблем во тоа што протекуваат доверливи податоци од СЈО

 Датум и време на објавување: 21.07.2016 12:30

 Датум на рецензирање: 25.07.2016

 Рецензент: Владимир Мирчески

 ЈА БРАНИ ВЛАСТА, ГИ НАПАЃА МЕДИУМИТЕ

Интересна аргументација – кога висок функционер на владејачката партија е повикан пред обвинител, а таму го чекаат медиуми, тогаш тоа е политичка местенка и „протекување доверливи податоци од СЈО“. Искрено оваа теза „не држи вода“, зашто објавување фотографија од конкретниот случај на битолскиот градоначалник осомничен за злоупотреба на илјадници евра, во никој случај не е нешто непрофесионално или неморално за кој било новинар. Слика на политичар, независно од која партија, кој можеби ја оштетил државата, како оди пред обвинител, пред сè, e вест. Исто, како што беше вест неколкукратното појавување на лидерот на опозицијата пред обвинителството. Тогаш никој не велеше дека станува збор „протекување доверливи податоци“ како што сега се тврди. Причината за ваквиот пристап, според прикажаното, е само поради фактот дека Владимир Талески е од редовите на ВМРО-ДПМНЕ.

„Специјалната јавна обвинителка Катица Јанева во недостиг на материјални докази против битолскиот градоначалник Владимир Талевски го поддржува спектакуларното политичко злоупотребување на работата на СЈО со кое се оцрнуваат високи функционери на владејачката ВМРО-ДПМНЕ.

Јавноста вчера коментираше дека проценката на СЈО и СДСМ е дека во недостиг на никакви материјални докази против Талевски, треба максимално да се искористи моментот и барем медиумски да се поентира преку негово оцрнување од страна на новинарите кои се на платни списоци на СДСМ – Сорос“.

Ова е само плус показател за двојните аршини и за пристрасноста на материјалот – плаче кога е власта во прашање, а ликува ако е тоа некој од опозицијата. Неприфатливо. Апсолутно не се успеало да се задоволи членот 14 од Кодексот на новинари кој вели дека новинарот мора да обезбеди професионална дистанца од политичките субјекти.

СПИНЕРСКА НОТА

Значи, текстот е исклучително лабав зашто не успева да го образложи и да го одбрани тврдењето за политички мотивиран случај. Никаде не може да се забележат јасни и недосмислени докази што би ги поткрепиле сериозните обвинувања што написот ги испорачува на адреса на СЈО, опозицијата, но и медиуми. Едноставно, нема реални извори за тие силни зборови.

„Соросовите медиуми објавуваат информации од истрагата, а Катица Јанева не гледа проблем во тоа што протекуваат доверливи податоци од СЈО“.

Дури и информациите што се побарани и добиени од СЈО во овој случај се злоупотребени, дадена им е спинерска нота, иако од тоа што е напишано, јасно е дека оваа институција го објаснила случајот и проценката дека не станува збор за штета за истрагата, туку за информирање на јавноста. Иако СЈО одговорило, сепак се инсистирало на материјал кој како да сака самоиницијативно со глава да удира во ѕид наспроти фактичката ситуација, која вели дека станува збор за истражна постапка и дека податоците, вклучувајќи го повикувањето на битолскиот градоначалник во СЈО, не се предмет на тајна, туку се информација од јавен интерес.

Сè на сè, конструиран е материјал кој се урива од сопствената тежина на неаргументираност, пристрасност и на шпекулации.