Чаршиски муабет!
Објавено во Рецензии
on 20 - 07 - 2016 Автор: Димитар Тануров[Рецензија: Ивонче милионче извисила- непожелна за уредник на Дневник ?!]
Материјалот што го рецензираме е шпекулативен и коментаторски, не е поткрепен со никакви факти или изјави, поради што повеќе наликува на чаршиски муабет, отколку на новинарски производ.
Линк до оригиналниот напис: Ивонче милионче извисила- непожелна за уредник на Дневник ?!
Датум и време на објавување: 17.07. 2016
Датум на рецензирање: 19. 07. 2016
Рецензент: Димитар Тануров
ОЗБОРУВАЊЕ
Самиот наслов навестува дека текстот ќе биде етикетирачки и коментаторски. Во ниту еден дел од оваа објава не се наведува изворот на наводната информација, поради што се доведува во прашање нејзината вистинитост.
Написот повеќе наликува на озборување. Во него нема никаква потврда на изнесените тврдења, не се побарани изјави ниту од Ивона Талевска, ниту од МПМ и од „Дневник“, ниту пак, од газдите на „Вечер“ и на „Сител“ , кои, исто така, се споменуваат во текстот.
Според својата форма, веројатно би требало да биде класична вест, но во неа освен коментари и шпекулации, нема факти со кои ќе се поткрепи паушалната информација што се пласира како стопроцентна вистина. Тоа може најдобро да се забележи од следните реченици:
„Владеачката партија чија ударна новнарска тупаница со години и се дуото Ивонче и Лаки, пред извесно време испланирала весникот Дневник да го “појача“ односно на челната позиција предизборно да ја смести Ивонче. Ваквата идеа наишла на нож на менаџментот и газдите на МПМ кој изричито несакале да чујат Ивона да биде на нивниот платен список па дури и главен уредник“.
БЕЗ ПРОФЕСИОНАЛНА ДИСТАНЦА
Написот е полн со печатни грешки и има несоодветна интерпункција. Исто така, во согласност со новинарските стандарди за пишување, личностите што се споменуваат во еден текст се наведуваат со име и презиме или само по презиме, дури и кога станува збор за личности кои ни се блиски во приватниот живот. На тој начин се прави професионална дистанца. Во конкретниот случај, користењето само на името има цел да омаловажи и да се подбива со споменатите личности.
Текстот е така напишан и пласиран што со него се прекршени повеќе членови од Кодексот на новинарите, меѓу кои:
Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно. (Член 1)
Новинарот ќе го назначи изворот на информациите, но ако изворот бара да остане анонимен, новинарот ќе го заштити.(Член 4)
Новинарот треба да прави разлика меѓу фактите и мислењата, меѓу веста и коментарот. (Член 13)
Новинарот мора да ја негува културата на говорот и етиката. Неспојлива со новинарската професија е непримерната комуникација со јавноста. (Член 15)
Новинарот ќе ги чува угледот и достоинството на својата професија, ќе ги поттикнува заемната солидарност и различност на ставовите и нема да го употреби својот медиум за пресметка со личности, вклучувајќи ги и своите колеги.(Член 16)
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
не може да се утврди
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
несоодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
нема мултимедијални елементи
нема контекстуални линкови
стилски неуреден
неповрзан со тагови