Бројки, спин-тези и коментари
Објавено во Рецензии
on 22 - 12 - 2015 Автор: Владимир Мирчески[Рецензија: Поради очајната поддршка од граѓаните Заев бега од избори]
Во овој текст имаме маневар за избегнување одговорност. Нешто како народната „Грижо моја, премини на друг“. Се префрла вината на другата страна во политичките преговори: за пробивањето на роковите, за (не)исполнување на зацртантите задачи неопходни за нормални избори напролет… Убав спин кој не го „перат“ ниту бројките од истражувањето на јавното мислење, кое недамна беше обелоденето.
Линк до оригиналниот напис: Поради очајната поддршка од граѓаните Заев бега од избори
Датум и време на објавување: 17.12.2015 14:21
Датум на рецензирање: 20.12.2015
Рецензент: Владимир Мирчески
ТЕКСТ СО ДВЕ ЛИЦА
Да раздвоиме две работи – бројките и повикувањето на нив се едно, а извртувањето на состојбата, пристрасноста и коментаторскиот пристап се друго. Текстот, всушност, има две лица – првото, кое му дава некаков си кредибилитет зашто се повикува на резултати од истражување на јавното мислење и второто, апослутно нелигитмно од аспект на непочитување на професионалните стандарди. Ако написот се држел само до податоците на „Брима Галуп“ и ако се имал ставот на СДСМ, тогаш тој би „поминал“ без поголеми проблеми.
Ама! Во ваквите случаи, безмалку, секогаш има едно „ама“.
И така, „ама“ на бројките од анкетата се накалемени и спин-тези и коментари, апсолутно непотребни, кои целосно го урнисуваат материјалот. Малку за спинот.
„Зоран Заев бега од избори. Главниот адут му е одолговлекување на роковите, но и продлабочување на кризата преку спроведување на деструктивното сценарио“.
Интересно тврдење, ама невистинито. Меѓународната заедница, која му кумуваше на Договорот од Пржино, како и на преговорите што треба да доведат до реално имплементирање на договореното, кажа дека има пробивање на роковите и дека едната страна во разговорите е неконструктивна и не се однесува сериозно. Тоа, според посредникот во процесот, била власта. Токму странците предупредуваа дека без исполнување на сè што е утврдено, во април избори ќе нема.
Од самиот текст се препознава дека власта, најверојатно, е извор на дел од информациите, особено, на тие што се однесуваат на последните преговори на четворицата лидери. Ама, тоа не е наведено. Поточно, нема какво било повикување кој е „бриферот“. Барем да имаше и формулации од типот „дознаваме“, „наши извори“, „од вклучени во процесот“, што се вообичаени новинарски алатки за пласирање информации (иако, во последниот период често злоупотребувани). Така, на пример, не се кажува кој вели дека Оливер Спасовски имал девет соработници, а Фросина Ременски шест? Можеби е така, а можеби не. Дилемата останува, макар што, можело да се прашаат повиканите дали навистина тоа е така. И да не се добиело одговор, сепак ќе се покажала одредена доза на ангажираност.
„Заев и СДСМ служат како портпароли на специјалното обвинителство. Истовремено се повеќе е забележлива нервозата во СДСМ, па Заев си го покажува вистинското лице. Заев и СДСМ станаа портпароли на Катица Јанева“.
Ова е коментар, без дилеми… А впечатокот го дополнува наредната реченица:
„Заев на лидерската, а Петре Шилегов вчера бесе портпарол на Јанева. Тој даде изјава што имала, што немала и што ѝ требало за да ги извршува работите во полн капацитет“.
Тенденциозно, нема што. Иако, нема ништо изненадувачки во заинтересираноста на една партија, во конкретниот случај опозицијата, за тоа дали и во какви услови функционира Специјалното јавно обвинителство. Зашто, од неговата ефикасна работа ќе зависат многу клучни елементи до најавените пролетни избори.
Имаме работа со необјективен материјал, кој ги злоупотребува бројките од анкетата за да ѝ даде поинаков тек на актуелната состојба. Ова е некакво новинарско самоволно амнестирање на власта за доцнењето во роковникот со задачи од Договорот од Пржино, „ама“ таков „попуст“ нема и за опозицијата.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
официјални, анонимни
релевантни, нерелевантни
не може да се утврди
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
поврзан со тагови