[Рецензија: Македонија ја има најголемата тајна: Светски научници и НАСА тврдат дека Македонија ја крие тајната на бесплатна енергија!]

Информацијата за да биде точна и потврдена, мора да има извор, тоа е темелот врз кој се гради веродостојност на новинарски текст. Тој може да биде анонимен, дискретен, таен, но мора да постои, а должност на новинарот е на читателот да му каже од каде му се информациите што ги објавува. Особено ако новинарот, за да му даде поголема тежина и сериозност на напишаното, уште во насловот се повикува на референтни извори и на публиката ѝ соопштува дека: „Светски научници и НАСА тврдат дека Македонија ја крие тајната на бесплатна енергија“. Во текстот што го рецензираме нема ни „с“ ни „н“ од најавените авторитети, па тоа може да нè наведе на помисла дека станува збор за манипулација со читателите, лажна информација или објавување невистина.

Линк до оригиналниот напис: Светски научници и НАСА тврдат дека Македонија ја крие тајната на бесплатна енергија

Датум и време на објавување: 08.11.2015, 16:39

Датум на рецензирање: 09.11.2015

Рецензент: Александар Писарев

СЕКОГАШ ИНТЕРЕСЕН

Самото спомнување на рудникот Алшар во Мариовско предизвикува кај публиката голем интерес, бидејќи, според бројни текстови досега објавени за овој рудник, се работи за навистина чуден феномен и за наоѓалиште на ретки руди и минерали.

Непотпишаниот автор на репортажата, чија писменост, содржајност и јавен интерес не можеме да ги спориме, широко и детално опишува што крие утробата на рудникот. Можеби тоа е така, но во текстот нема ниеден извор кој е спомнат во насловот и кој би ја потврдил веродостојноста на напишаното.

„Во македонскиот рудник Алшар на Кожуф има и лорандит, минерал на талиумот, кој служи за да се детектира, да се лоцира неутринот, кој пак има директно потекло од Сонцето и единствено на планетата го има тука. Талиумот во Алшар, а со тоа и неутринот, по своето количество е светски, планетарен раритет. Ако се успее да се одвои неутринот од талиумот, нашата планетарна наука ќе ги разбере процесите со чија помош се генерира енергијата на Сонцето.“

КОЈ ГО ТВРДИ ТОА?

За да му даде и нота на ексклузивност на текстот, авторот се „повикува“ на светските научници и на НАСА, но тие се некаде изгубени или се измислени, што го девалвира напишаното и предупредува на непочитување на одредбите на Кодексот на новинарите на Македонија.

„На територијата на Република Македонија постојат богатства кои ги нема ниту во една друга земја. Македонија ја има најголемата тајна, светски научници и НАСА тврдат дека Македонија ја крие тајната на бесплатна енергија!“

АЛШАР ИМА КОНЦЕСИОНЕР

А, не морало да биде така. Рудникот Алшар е уште на почетокот од 2013 година даден под концесија на домашната компанија, која за таа намера платила на државата 1,5 милион денари и која требало до април ова година веќе да излезе со првите сознанија за ова наоѓалиште на ретки минерали. Тоа не е никаква тајна и за тоа зборувал при доделување на концесијата и министерот за економија, Ваљон Сарачини, и авторот можел да го праша носиталот на концесијата што е досега откриено во утробата на земјата на овој локалитет и да ни презентира точни и веродостојни податоци.

Изворите на информации се клучни и незаобиколни за почитување на новинарските стандарди. Практично, без извори не би требало ништо да биде објавено, дури и ако новинарот нешто сам открие, мора да се потпре на изворите за да го потврди или демантира откриеното.