[Рецензија: СКАНДАЛ: Со пари на граѓаните СДСМ купува поддршка од соросовите невладини организации]

Пред нас имаме текст кој нецелосно и пристрасно ги информира своите читатели за активностите на локалната самоуправа, конкретно во скопската Општина Центар. Тема на написот се средствата што Oпштината ги има алоцирано за активностите на неколку невладини организации, за кои написот тврди дека „или немаат активности или активностите им се насочени во промоција на политиките на СДСМ“. Написот, меѓутоа, не нуди аргументи за ваквото тврдење туку овој заклучок го извлекува врз основa на разгледувањето на фејсбук-профилите на две од четирите невладини организации за кои станува збор и содржината која таму е објавена. Проблематизирајќи ја одлуката на локалната самоуправа, за која станува збор, наместо да се истражи за кои точно проекти се дадени парите, дали тие проекти се релевантни, дали се реализирани и, евентуално каков бенефит ѝ донеле на локалната заедница, овој напис се фокусира на тоа какви политички ставови поддржуваат раководителите на овие НВО. Занимавајќи се со нечие право на слободно политичко мислење и организирање, заборавена е смислата на написот -да информира за релевантни теми и содржини. А, релевантна тема ќе беше – не кој – која политичка опција фаворизира, туку што од неговата општествена дејност платена со парите на граѓаните е сработено во нивна полза. Тоа на овој напис, секако ќе му дадеше смисла и издржаност.

Линк до оригиналниот напис: СКАНДАЛ: Со пари на граѓаните СДСМ купува поддршка од соросовите невладини организации

Датум и време на објавување: 10.04.2016 / 12:48

Датум на рецензирање: 15.04.2016

Рецензент: Југослава Дуковска

САМОПСЛУЖУВАЊЕ ОД „ФЕЈСБУК“

Од аспект на вистинитоста на изнесените тврдења, дел од нив се точни, како, на пример, податокот, поткрепен со факсимил на одлуката на Општина Центар за тоа кои невладини организации годинава добиле колку пари од Општината. Точен е и податокот дека едната од невладините организации, „Еквилибриум“, има веб-страница, која не е ажурирана неколку години и за неа пребарувачот „Гугл“ исфрла само стари вести и информации. За некои, пак, објавени информации, текстот не кажува од каде потекнуваат, туку ги пласира без извор, па не може да се посведочи вистинитоста:

„Во 2015 земаат 500.000 денари од општина Центар. На крај на годината пријавиле вишок на приходи од 499.916 денари. Тоа значи дека парите кои им ги исплатил Жерновски не ги потрошиле. Но, општина Центар и годинава им доделува 400.000 денари.“

Но, затоа, пак, најмногу внимание е посветено на невладината „Профицио“, чијшто фејсбук-профил детално е прочешлан, а дел од содржините неовластено пренесени, поточно копирани како илустрации во текстот, за што „Профицио“ најави тужба. Од „скенирањето“ на Профицио, во написот „мудро“ се заклучува дека се работи за проопозициона и „соросоидна“ невладина.

„Една слика 1000 зборови, а кај нив, многу слики. На сите без двоумење се гледа дека се работи за т.н. соросова невладина организација која е дел од сите активности на сличните невладини во последниот период како протести за иселените млади од Македонија, поддршка за мигрантите, протести против нечистиот воздух, поддршка за невладината МОСТ.“

Никаде не појаснува зошто тоа би била пречка за соработка со локалната самоуправа, секако, доколку се работи за релевантен и за издржан проект на кој тие соработувале.

БРКАЊЕ ВЕШТЕРКИ

Во написов владее едно општо шаренило од извори на информации, од формални, до неформални, релевантни и нерелевантни. Но, особено е проблематично користењето на фејсбук-профилот на една од организациите, влучувајќи го и пренесувањето на приватни фотографии (без одобрение) на „Профицио“ и толкување на нивната содржина и контекст по сопствено наоѓање. Оттаму е извадена и приватната фотографија на претседателката на „Профицио“ со поранешната новинарка на „А1-телевизија“, Катерина Цаневска-Арсовска, проследена со следнава реченица:

„Претседателот на Профицио Билјана Младеновска на повеќе фотографии се наоѓа во друштво на Катерина Цаневска – Арсовска, поранешната новинарка на А1 , а сега работи токму во Општина Центар.“

Несомнено, фотографијата ги прикажува двете личности заедно, но што е тука спорно, на тоа прашање написов не дава одговор, веројатно сметајќи дека доволно елаборирал за матните врски на оваа невладина организација. Се поставува прашањето дали медиумот сугерира дека познанството со вработен во општинската администрација автоматски би требало да биде причина некоја невладина организација да не може да соработува со таа општина?

Еден од „крунските аргументи“ во текстот е следново:

„Потписници се и на писмата на т.н. здружени невладини организации упатени до ЕУ, Амбасадата на САД, Евро-пратениците итн“

а, исто така, и тоа што на фејсбук-профилот на невладината организација бил пренесен ставот на Венецијанската комисија за објавувањето на прислушкуваните материјали, ставот на МОСТ за одржувањето на изборите или писмото од невладините организации до Европската комисија и слични содржини.

По исчитувањето на овој напис, кој проциркулира низ повеќе медиуми што поддржуваат владини политики, може да се заклучи дека е залудно потрошено времето – написот не ги адресира вистинските, легитимни дилеми кои можат да поизлезат од соработката на една општина со невладини организации (за кои и какви проекти се даваат пари) туку сè се сведе на бркање „соросоидни“ вештерки и на пропаганда.